काठमाडौं । देशभरका न्यायाधीशहरुको खटनपटनको जिम्मेवारी पाएको न्याय परिषद् सचिवालयले विभिन्न अदालत र न्यायिक निकायमा कार्यरत न्यायाधीश, सरकारी वकिल तथा न्याय सेवामा कार्यरत कर्मचारीहरुको व्यक्तिगत विवरण मागेको छ ।
न्यायाधीश र न्याय सेवाका कर्मचारीहरुको व्यक्तिगत विवरण अद्यावधिक गर्ने कार्यलाई निरन्तरता दिँदै परिषदले त्यस्तो विवरण मागेको हो ।
परिषद्ले सार्वजनिक सूचना जारी गर्दै सम्बन्धित सबैलाई आफ्नो विवरण अधावधिक गर्न भनेको छ ।
परिषद्ले न्यायाधीश र कर्मचारीहरुको नागरिकताको प्रमाणपत्र, शैक्षिक योग्यता, सिटरोल र तालिमसम्बन्धी कागजातहरुको प्रतिलिपि उपलब्ध गराउन भनेको छ ।
यदि कसैले यी कागजातहरु यसअघि पेश नगरेको भए वा कुनै कागजात बुझाउन बाँकी भए फागुन २५ गतेभित्र न्याय परिषद्को ईमेल ठेगाना info@jcs.gov.np मा पठाउन भनिएको छ ।
