असार ९, काठमाण्डौं । संविधानसभाको संविधान मस्यौदा समितिको कार्यदलले ३५ भाग र ३१२ धाराको नयाँ संविधान मस्यौदाको प्रारूप तयार पारेको छ ।
संविधानको प्रारम्भिक मस्यौदा एकिकरण र विवाद समाधानको जिम्मेवारी पाएको कार्यदलले मंगलबारसम्म पाँचवटा विषयगत उपसमितिका प्रतिवेदनमाथिको दफावार छलफल सकेर यस्तो प्रारुप तयार गरेको हो । संबैधानिक, राजनीतिक संवाद तथा सहमति समितिले विवादकै रुपमा पठाएका विषयको निरुपण हुन बाँकी रहेकाले प्रस्तावित प्रारुपमा सामान्य फेरबदल भने हुन सक्छ ।
कार्यदल स्रोतका अनुसार संवाद समितिबाट विवादकै रुपमा आएका र उपसमिति तथा कार्यदल स्तरमा भएको छलफलमा एकरुपता पाउन नसकेका विषयलाई प्रमुख दलका शीर्ष नेताहरुसँगको परामर्शमा टुग्याउने समझदारी भएको छ ।
